CEBU, Philippines - Naputol ang kalipay sa mga residente sa Brgy. Punta Engaño sa dakbayan sa Lapulapu, sa miaging gabii human kini undanga ni Kapitan Lourdes Ibag gumikan kay way permiso.
Ang opisyal sa komitiba sa fiesta sa barangay nga si Ritchel Sumalinog sa maong barangay mibutyag sa Banat News nga walay nakasupak sa dihang mimando ang kapitana nga ipahunong ang pasundayag sa drama sa CCTN sa maong gabii.
Matud pa ni Sumalinog nga usa unta sa modala sa dramaturgo sa maong higayon mao si barangay Konsehal Josie Hayase, ang tag-iya sa Henode Beach Resort nga maoy sponsor sa maong drama.
Ang pagpahunong sa maong kalingawan gihimo sa kapolisan sa Station 2 nga gipangunahan ni P/CInsp. Conrado Manatad kinsa igo lang usab nga mituman sa mando ni Kapitan Ibag.
Sa dihang gikuwestiyon ni Sumalinog ug Konsehal Hayase si Kapitan Ibag, kini mipasabot nga wa lukati og permiso ang maong kalingawan hinungdan nga iyang gipaundang.
Gumikan niini naputol ang kahinam sa katawhan sa maong higayon kay wa nila masaksihi ang drama nga gitakda sa maong higayon.