Rama di na mobakwi sa iyang pag-veto sa ordinansa

CEBU, Philippines - Gipahibalo ni Mayor Michael Rama nga dili na gyud mausab pa ang iyang hukom sa pag-veto sa ordinansa nga gipasar sa konseho nga magsilot sa mga ginikanan nga modisiplina gamit ang hulga ug pagpanapat.

Kini maoy gibutyag sa mayor human ang 40 ka mga non-government organizations ug ubang pundok sa nagkadaiyang sektor ang mipadayag nga makigtagbo kaniya karong Lunes aron mangayo og katin-awan kung nganong dili siya mopirma sa ordinansa nga gipasar sa konseho.

Matud pa niya nga iyang atubangon ang maong mga NGO apan nakadesider na gyud siya nga dili kini pirmahan.

Gihulagway usab ni Rama nga tinalawan ang sugyot ni Bise Mayor Joy Augustus Young nga ipaagi og plebisito.

Nagkanayon si Rama nga dili siya makaako nga silotan ang mga ginikanan nga igo ra modisiplina sa ilang mga anak ug luoy kaayo kadtong mga kabos nga maglisod og bayad sa multa nga moabot ngadto sa P5,000.

Una na nga gipadayag ni Konsehal Leah Japson nga kinahanglan nga basahon ni Rama og tarong ang unod niini tungod kay alang kini sa kaayohan sa kabataan.

Dugang pa sa konsehal nga gaagi og taas nga pagtoon sa committee on laws sa konseho ang maong ordinansa.

Ang presidente sa Sangguniang Kabataan Federation –Cebu City Chapter ug co-author ni Japson sa maong ordinansa nga si John Philip Po II mipadayag nga kung basahon lang ang kinatibuk-ang unod sa ordinansa, igo ra kini miawhag sa mga ginikanan ang pag-umol og positibo nga disiplina ug dili sa bayolente nga pamaagi. (BANAT NEWS)