CEBU, Philippines - Swerteng naluwas apan anaa sa talandugong kahimtang ang 58-anyos nga mag-uuma nga aksidenting nakuryentihan sa mainline sa Cebu Electric Cooperative (CEBECO)-2 samtang kini nanapak sa buslot sa atop sa ilang balay diha sa barangay Dalinding lungsod sa Medillen niadtong Martes sa ala 1:00 sa hapon.
Nalandig sa tambalanan si Vetaliano Tepait Rosales, 58, kinsa nakaangkon og mga paso sa kalawasan human sa maong hitabo.
Matud ni PO1 Louie Misa sa Medillen Police Station dihang nahinabi sa Banat News gisugo sa iyang maguwang nga babaye ang biktima nga tapakan ang atop sa balay niini tungod kay magpunay og tulo kung moulan.
Samtang diha sa ibabaw kalit lang kining nadakin-as tungod usab sa kadangog sa atop ug aron di mahagbong sa ubos nakuptan niini ang livewire sa kuryente hinungdan sa pagkirig niini.
Ang mga estambay sa ubos nga bahin nga nakakita ni Rosales nga nagkirig kirig na sa ibabaw sa atop nagtinabangay pagpangita og paagi nga makuha kini og daling midala kaniya sa Verallo District Hospital sa siyudad sa Bogo apan girekomendar kini sa mga doctor nga ibalhin sa Vicente Sotto Memorial Medical Center. Ang lineman sa CEBECO-2 nga si Nestor Lapalan mao nay ni-report sa buhatan sa kapulisan sa maong panghitabo. - BANAT NEWS