CEBU, Philippines - Gihagit sa National Nutrition Council (NNC) ang matag tawo nga mokaon og tulo ka panaksang utan matag adlaw alang sa sustansyang gikinahanglan sa lawas ug paglikay sa sakit nga kanser ug uban pang bug-at nga balatiang makamatay.
Ang maong hagit gipalanog ni NNC7 Chief Parolita Mission kagahapon atol sa Kapihan sa PIA, usa ka tulomanon sa Philippine Information Agency ug sa DYMR Radyo ng Bayan Cebu nga gipahigayon didto sa La Fortuna -Sto. Niño Function Room ning dakbayan sa Sugbo.
Gibutyag ni Mission nga sa tulo ka tuig nga milabay nadiskobrehan nila nga mikibra ngadto sa tagduha na lang ka panaksan nga utanon ang gikonsumo sa matag Filipino matag adlaw nga naghatag og dakong hulga sa panglawas niini. Sa mga pagtuon nga gihimo sa NNC ilang nasuta matud pa ni Mission nga usa sa nakapalipat sa katawhan mao ang mga pagkaon sa mga fast foods outlet nga gipanarok dinhi sa nasud.
Nakalimtan na sa katawhan ang balor o kabililhon ug kamahinungdanon sa pagkaon og utan alang sa ikalig-on sa resistensya sa lawas batok sa mga hulga sa nagkalainlaing sakit nga makamatay.
Si Mission nagkanayon nga niining kasaulogan sa Nutrition Month sa tibuok buwan sa Hulyo, gidasig nila ang tanang Sugboanon ug mga katawhan sa Central Visayas nga mosanong sa awhag sa kagamhanan sa makanunayong pagkaon og utan. Gipadasig sa tema nga “Pagkain ng gulay ugaliin, araw-araw itong ihain “ si Mission milaum nga hatagan kini og dakong pagtagad sa katawhan.
Midugang siya nga kun gikinahanglan sa mga hamtong ang utan mas labing gikinahanglan kini sa gagmay’ng mga bata busa angay pangunahan sa mga ginikanan ang pagtudlo sa ilang mga anak bahin sa kabililhon sa utan. Hinuon ang Department of Education (DepEd) nahimong kaabag sa NNC sa pag-edukar sa kabataan sa pagpananom og utanon ug sa pagkaon niini aron sila na ang motudlo sa ilang mga ginikanang taspokan sa pagtanom ug pagkaon og utan. - BANAT NEWS