CEBU, Philippines - Nabalhug sa prisohan ang unom ka tawo kinsa nasakpan sa akto nga namutol og kahoy nga Gemilina apan walay permiso didto sa barangay Tuba sa lungsod sa Dalaguete niadtong Martes sa ala 1:30 sa hapon.
Ang mga suspetsado mao sila si Rene Racho, 44, minyo, nga taga barangay Bug-ot, sa lungsod sa Argao, Johnrey Empolode, 22, ulitawo, Crescencio Rellon Jr., 34, Ricardo Gabia,18, ulitawo, Pedelino Sanchez, 26 , minyo, ug Tomas Lantikse, 31, nga pulos taga Argao.
Nasakmit gikan kanila mao ang 43 ka mga linaras nga Gemilina ug chainsaw nga gigamit sa pagpamutol sa maong mga kahoy.
Ang mga linaras nga kahoy andam na untang itumod sa mga suspetsado ngadto sa suki nilang baligyaanan niini dihang naabtan sila sa kapolisan.
Si SPO2 Cleto Pia, imbistigador sa Dalaguete Police Station mibutyag sa Banat News nga sa wala pa nila dakpa ang mga suspetsado, nakadawat sila og report bahin sa mga suspetsado nga namutol og kahoy didto sa nahisgutang lugar.
Daling miresponde ang kapolisan ug naabtan nila sa akto ang mga suspetsado nga padayon pang namuril sa mga punoan sa Gemilina. Dihang gipangitaan sila og permiso, napakyas sila sa pagpakita niini hinungdan nga gidakop ug gisakmit sa kapolisan ang mga pinutol nga kahoy ug ang chain saw sa mga suspetsado. - BANAT NEWS