CEBU, Philippines - Gipahibalo ni Kongresista Tomas Osmeña nga pasakaan niya og kaso sulod karong semanaha si Mayor Michael Rama og “abuse of authority” tungod sa giingong pagkiha sa mayor kang Finance Secretary Cesar Purisima sa Department of Finance. Ang kiha ni Rama may kalambigitan kini sa pagtudlo ni Purisima kang Emma Villarete isip officer-in-charge sa City Treasurer’s Office hulip kang Ofelia Oliva.
Matud pa ni Osmeña nga wala moagi si Rama sa Konseho pagkiha niini kang Purisima busa iya kining gihulagway nga nag-abusar sa iyang gahom ug dili makiangayon alang sa konseho.
Dugang pa sa kongresista nga kinahanglan gyud nga mananghid si Rama kung duna siya’y ipangkiha nga personalidad gumikan kay gigamit niini ang terminong “Cebu City Government.”
Samtang si Bise Mayor Joy Augustus Young misaway usab sa gihimo ni Rama ug misugyot hinuon mas maayo pang gigamit sa mayor mao ang terminong Office of the Mayor.
Kahinumduman nga gipadayag kaniadto ni Rama nga duna siya’y katungod nga morekomendar kung kinsay buot niyang himuong treasurer sanglit siya ang head sa executive.
Matud pa sa mayor nga nakauyon siya sa abilidad ug epektibo si Oliva sa iyang pwesto busa dili siya motugot nga hulipan kini sa iyang puwesto. (BANAT NEWS)