Rama di manumbaling kun di manambong ang BOPK sa iyang SOCA ugmang adlawa

CEBU, Philippines - Nakahan-ay na ang tanan alang sa State of the City Address (SOCA) ni Mayor Michael Rama nga himuon ugma sa hapon (Hulyo 2) diha sa Plaza Sugbo sa tuyo nga bisan mga yanong tawo makatambong ug makapaminaw.

Si Rama una na nga mipadayag nga imbitado ang tanang opisyales sa siyudad ilabi na ang mga sakop sa Konseho nga sagad sakop sa Bando Osmeña Pundok Kauswagan (BOPK) sa karibal sa politika nga si Kong. Tomas Osmeña.

Mipadayag si Rama nga dili niya panumbalingon kung dili siya tungahon sa maong mga opisyal sanglit alang man sa katawhan ang itunol niya nga mensahe.

Apan niadtong nakalabay’ng semana gipadayag ni Bise Mayor Joy Augustus Young nga nagkasabot ang mayoriya sa konseho nga kaalyado sa BOPK nga dili motambong sa SOCA.

Matud pa ni Rama nga ganahan siya nga makadungog ang publiko sa iyang SOCA sanglit iyang isaysay ang iyang mga nabuhat sa duha ka tuig na niya nga paglingkod isip mayor ug ipahibalo usab niya ang iyang mga plano alang sa katawhan.

Sa dili pa niya itunol ang iyang SOCA, ipahigayon usab ang blessing sa Senior Citizens Park nga nahimutang sa atubangang bahin sa buhatan sa mayor.

Matud pa ni Rama nga gituyo niya ang maong proyekto aron adunay kaugalingong parke ang mga senior citizen nga duol usab sa buhatan sa gobiyerno.

Gawas niini, gipadayon gihapon ni Rama ang proyekto niya nga financial assistance alang sa mga senior citizen. Nasayran nga gipaubos karon sa ebalwasyon kadtong mga senior citizen nga nawala ang ilang pangalan sa master list. (FREEMAN)