CEBU, Philippines - Ayaw ibalewala ang bation mong kalaay sa kinabuhi. Kay mahimo unya kini nga hinungdan sa mas dili na unya kalikayan, nga makamugna na og kadaot sa kaugalingon, kun kini himoon na lang nato nga maoy naandan na sa tanang gimbuhaton sa paghunahuna ug panglihok matag higayon nga ato kining mabati.
Ang kalaay maoy tilimad-on sa pagpaundayon na lang sa mga kalihokan nga wa nay mabuhat kun dili ang pagpahigayon o pagdawat o paghuwat na lang kun unsay dangatan sa sitwasyon. Ang kapuol maoy unang dangilag sa kalaay.
Sundan kini sa kamingaw hangtud tugkan kana’g nerbiyos, ug kun mograbe pa, mawad-an na sa maayong kabuot, nga mosangpot sa paghikog.
Busa aron malikayan, angay nga ato kining makat-onan;
Kun unsay anaa sa isip mo, ipagawas pinaagi sa pagbuhat dayon i-uban ang hugot nga determinasyon. Ayaw anang “SULAYAN KO LANG”, kun dili ipursigido gyud nga “MAHIMO KO NI.” Pahiyumi ang problema nga molampos ka sa tinguha nimo.
Kun mahimo na, paghimo’g daghang alternatibo nga matigayon ang pag-ilin-ilin segun sa imong kakomportable. Aron di mapug-ok ang utok, palihoka ang isip, kay kun magpondo, mao kanay makapalaay ug mopaluya sa kadasig mo.
Permi ehersisyo ang pangutok, aron permi mahatagan og kuryente ang atong utok nga mopabaskog sa kinatibuk-ang sistima sa atong panglawas.
Ang utok maoy director sa kalihokan sa lawas busa hatagan sila kanunay sa mga masustansyang pagkaon, aron paglahutay sa unsa mang mga kalihokan.
(BANAT NEWS)