CEBU, Philippines - Patay nang napalgan niadtong Lunes sa alas 6:00 sa buntag ang usa ka kuyme human kini makuryentihi samtang nag-inusarang nag-inom og bino sulod sa ilang balay didto sa Sitio Baybay, barangay Poblacion West sa lungsod sa Moalboal sa miaging Domingo sa gabii.
Ang biktima nailhan nga si Abel Pocong, 60, minyo, nagpuyo sa maong lugar ug kuyme sa tari ug tigbakay.
Si PO1 Romeo Legaspi Jr., sa Moalboal Police Station mibutyag sa Banat News nga si Rey Gador, 30, kinsa paryente sa biktima maoy nakadiskobre sa patay’ng lawas sa biktima.
Matud pa ni PO1 Legaspi nga nagtuwa og isda niadtong Lunes sa buntag si Gador ug miadto kini sa balay sa biktima kay nangayo og asin dihang maoy iyang nakita ang biktima nga nagbuy-od na sa sawog nga nasunog ang kamot ug tiil ug wala nay kinabuhi.
Nasud-ong usab niya nga nagkupot pa kini sa plug sa iyang telebisyon samtang gisipitan ang wire niini sa iyang ilok.
Samtang tupad sa biktima mao ang usa ka botelya nga Tanduay nga wala mahurot og inom niini .
Gituohan sa kapolisan nga malagmit gumikan sa kalipong sa bino, imbis plug sa TV ang ituslok niini ngadto sa outlet sa kuryente, ang iya tingaleng tudlo maoy gipaslak hinungdan nga nakuryentihan kini.
Nasayran nga nag -inusara lang ang biktima sa ilang balay sa maong higayon kay ang iyang asawa miduaw sa ilang anak nga nagpuyo sa dakbayan sa Sugbo.
Walay pagtuo ang kapolisan nga gituyo sa pagpatay ang biktima. (BANAT NEWS)