Kawani sa DSWS positibo sa drugas

CEBU, Philippines - Usa ka babaye nga kauban sa 57 ka kawani sa Cebu City Hall nga gipaubos sa surprise drug testing kagahapon nasakpan nga positibo sa paggamnit og gidiling drugas.

Ang maong kawani kansang ngalan gipugngan anaa magtrabaho sa buhatan sa Department of Social Welfare and Services (DSWS) sa City Hall.

Sumala pa ni Joey Herera, ang pangulo sa City Office on Substance Abuse and Prevention (COSAP) nga ang DSWS maoy ika-limang departamento sa City Hall nga gipaubos nila sa drug test.

Matud pa ni Herera nga kun ugaling sa confirmatory test, mapalgan nga positibo gihapon ang maong babaye diha-diha himoan dayon kini og lakang sa Human Resource Department sa pagsuspenso kaniya o kaha sa dili na pag-renew sa kontrata niini kun kini usa ka kawani nga ubos pa sa contractual position.

Matud pa ni Herera nga laing departamento na usab ang ilang isunod pagpailawom sa surprise drug testing sa sunod semana.

Apan gawas sa mga drug testing sa City Hall, ang COSAP nagpahigayon usab og drug test sa mga kawani sa kabarangayan.

Nasayran usab gikan kang Herera nga usa ka kawani sa City Treasurer’s Office ang nasuta nga positibo sa confirmatory test, kini human sa usa gihapon ka surprise drug test nga gihimo sa COSAP sa maong buhatan.

Matud pa ni Herera nga mas maayo nga likayan sa mga kawani sa kagamhanan ang paggamit sa gidiling drugas kay ang COSAP dili mopahibawo kanus-a sila mopahigayon og drug test. (BANAT NEWS)