CEBU, Philippines - Wala pa gihapon mailhi sa kapulisan ang mamumuno nga mipusil patay ni SPO2 Roberto Canencia niadtong Lunes kinsa bag-o pang migawas sa korte aron unta motambong sa iyang kasong giatubang sa dakbayan sa Danao. Si Supt. Ricky Delilis, hepe sa Danao City Police Station nagkanayon nga padayon pa silang nanghipos og mga impormasyon aron mailhan ang mga suspetsado sa pagpusil patay sa biktima.
Matud ni Delilis nga may nakuha silang video footage nga gimuntar duol sa lugar diin gipusil ang biktima apan kadto rang pagsibat na sa mga kriminal nga luwan sa kolor pink nga motorsiklo.
Ang angkas ug drayber sa motorsiklo pulos nag-helmet ug nag-bonnet sa ilang nawong ug nakita sa video ang angkas nga nagdala og machine pistol.
Nagplano si Delilis nga magpatabang sa Criminal Investigation and Detection Group (CIDG)-7 tungod kay aduna silay kahimanan aron maklaro ang kuha sa video footage.
Dako ang pagtuo sa kapulisan nga planado ang pagpatay sa biktima ug dili mominus lima ka mga gikatahapan ang nalambigit niini. Gitinguha pa sa kapolisan nga makakuha usab og kopya sa video footage gikan sa usa ka pawnshop nga dunay close-circuit television camera sa atbang diin gipusil si Canencia. Apan giingong nagdumili pagkooperar ang tagdumala niini sa kapolisan.
Gitutokan sa mga imbestigador ang kalambigitan sa trabaho sa biktima sanglit nahisakop man siya sa Anti-Illegal Drugs Task Force nga dunay daghang nadakpan ug napapriso. Si Lelisa Canencia, asawa sa biktima atol sa interview sa Tv5 kagahapon sa buntag miawhag sa kapolisan nga paspasan ang imbestigasyon aron mataral ang mga mamumuno lakip na ang mastermind niini. (BANAT NEWS)