CEBU, Philippines - Usa ka adlaw human gipatay ang usa ka polis sa Danao, usa usab ka retiradong polis ang gibanhigan patay samtang naangol ang drayber sa motorsiklong gisakyan niini ug swerteng nakalingkawas ang asawa sa biktima niadtong Lunes sa buntag.
Ang namatay mao ang retiradong si SPO3 Ambrocio Pableo,62, nagpuyo sa barangay West Poblacion sa lungsod sa Moalboal kinsa padulong na unta sa ilang umahan sa barangay Cabadiangan lungsod sa Alcantara dihang gibanhigan pag-abot sa barangay Lawaan sa samang lungsod.
Samtang ang naangol mao ang drayber sa habalhabal nga si Ian Soreno, samtang wala maunsa ang asawa ni Pableo nga si Jocelyn apan nakugang sa hitabo.
Wala hinuoy swerte ang gitumbok nga suspek kinsa nadakpan sa hot pursuit operation nga si Dodgie Dionaldo alyas Jeje, 28, taga barangay Cabadiangan sa Alcantara human positibong giila ni Jocelyn nga maoy namusil kanila.
Matod ni SPO3 Brendo Joel Beriarmente sa Alcantara Police Station dihang nahinabi sa Banat News gipakyaw sa magtiayon ang habalhabal ni Soreno aron mobisita sa ilang umahan sa maong lugar.
Apan pag-abot sa maong lugar gipauwanan sila og bala sa suspek nga nag-atang nang daan ug nagpasalipod sa punoan sa lubi.
Ang biktima nga naigo sa iyang liog ug nilapos ang bala ang natagak kini sa motor ug nangatumba. Si Soreno naigo sa tuong kamot ug gidala sa tambalanan.
Ang suspek kinsa nakit-an sa asawa sa biktima sa pag-ikyas niini gipadakop niya sa grupo nila ni SPO2 Meliton Agadier sa pinuy-anan niini.
Matud pa sa asawa sa biktima makadaghan na silang higayon nga pusilon sa suspek matag duaw nila sa ilang umahan ug kini ilaha nang gireklamo kaniadto sa kapolisan bisan wala sila mangaigo. Ang kapulisan nagsusi sa kung unsay motibo sa maong pagpamanhig.(/EIM)(BANAT NEWS)