Inahan sa nadisgrasyang anak gihinabangan

CEBU, Philippines -  Ang Kapitolyo mihatag og P10 mil ngadto sa inahan sa duha ka bata nga naugdaw uban sa pagkasunog sa ilang balay didto sa barangay Sam-ang , dakbayan sa Toledo sa milabay’ng Mayo 4, 2012.

 Si Jovelyn Labaho   ang inahan sa mga biktima mapasalamaton kaayo kang Governor Gwendolyn Garcia kinsa maoy mimando sa nagdumala sa Provincial Social Welfare & Development Office (PSWDO) sa Capitol sa pagpahigayon sa maong tabang.

 Nasayran nga ang nabiktima nga sila si Harvey Borgador, 5, ug ang iyang manghud nga si Alexander Borgador, 2 , mao ray nahabilin sa balay nga nangatulog kay ang ilang amahan ug inahan namalit og tuba sa silingan nilang tindahan sa maong higayon.

 Pag-uli sa magtiayon ugdaw na ang ilang balay kauban ang ilang duha ka anak. Gumikan sa sakit nga kamatayon sa mga bata, gibati og kaluoy si Gobernador Garcia hinungdan nga nakahukom kini sa pagtunol og hinabang ngadto sa mga ginikanan.

 Gawas niini mitunol usab ang gobernador og hinabang ngadto sa inahan kansang anak naanod sa baha ug namatay didto sa sapa sa barangay Malingin, lungsod sa Liloan. Busa mapasalamaton usab kaayo si Merlyn Yuson ang inahan sa 12 anyos nga Rosquillos Festival Dancer sa iyang pagdawat sa P5 mil nga hinabang gikan sa gobernador nga gipaagi gihapon sa PSWDO.

 Si PSWDO Administrative Officer, Wilson Ramos ug Provincial Governor’s Office Chief-of-staff, Elizabeth Francia maoy mitunol sa maong salapi ngadto ni Yuson.

 Gawas sa P5 mil nga hinabang, nakadawat usab si Yuson og usa ka sakong bugas ug mga canned goods.

 Si Yuson nga usa ka biyuda ug may lain pang lima ka mga anak karon nagkanayon nga dako na og ikatabang ang maong kantidad   nga iyang nadawat. (/WC) - BANAT NEWS