Subject Binisaya gihangop

CEBU, Philippines - Gihangop ni Mayor Adelino Sitoy sa Cordova ang pag-edukar sa Department of Education (DepEd) sa mga tinun-an sa elementarya sa pinulongang Binisaya.

Matud pa ni Mayor Sitoy nga dugay na siyang naningkamot pagkombinse sa DepEd nga ikatudlo sa eskuylahan ang Binisaya kay daghan kaayong estudyante karon nga way kabangkaagan mosuwat ug mosulti og Binisaya.

Si Mayor Sitoy maoy pinasidunggang mamumulong atol sa founding anniversary sa Dagang Foundation Inc. (DFI) usa ka kahugpongan sa mga magsusulat og Binisaya nga gipahigayon sa miaging adlaw dinhi sa dakbayan sa Sugbo.

Giangkon niya nga makaayo alang sa kabataan nga katudloan sa atong kaugalingong pinulongan nga maoy magsilbing hagdanan alang sa pagkat-on ngadto sa uban nga pinulongan.

Matud pa niya nga subo kaayong palandungon nga sagad karon sa kabataan dili hanas sa pagsulti   og Binisaya ug dili usab hanas sa pagsulti sa uban pang pinulongan sama sa Ininglis.

Gitataw niya labing dali nga makakat-on sa lainlaing pinulongan ang mga kabataan nga nagtungha sa Grade I ug Grade II kun unahon sa pagkat-on niini ang kaugalingong pinulongan kay sayon na man lang nila ang paghubad niini. BANAT NEWS