CEBU, Philippines - Mokabat sa kapin sa usa ka milyon ka mga Filipino ang nakasulod og trabaho sa franchising sector karong gipalapdan kini sa Philippine Franchise Association (PFA) alang sa mga walay trabaho.
Matud pa ni PFA President Pardo Orbeta nga sa miaging tuig may 1.1 milyones ka mga Filipino sa tibuok nasud ang gidawat sa franchise sector (FS) nga naglangkob sa Micro, Small and Medium Enterprises. (MSME’s). Sa tuig 2000 adunay 174,482 ang nakatrabaho sa FS ug human sa 11 ka tuig, ang franchise sector misaka ngadto sa 825,518 ang nakatrabaho ning maong sektor.
Ang gidaghanon sa mga nag-franchise niadtong tuig 2000, 30,498 ra apan mitubo kini ngadto sa 125,000 sa tuig 2011
Dugang pa ni Orbeta nga ang franchising sector dako kaayo og gihatag nga tabang sa kagamhanan sa pagsulbad sa unemployment problem sa Pilipinas.
Si Orbeta mitumbok sa popular nga mga fast food chain nga mitumaw sa nasud nga maoy mihigop sa mga batan-on ug mga hamtong nga mga way trabaho aron mahimong produktibong Filipino. Sigun pa sa mga opisyales sa PFA ang FS dako kaayo og gikatampo sa nagtubo nga ekonomiya sa nasud.
Gumikan niini naikag kaayo ang mga kadagkoan sa PFA sa pagbukas og bag-ong opisina nila dinhi sa Sugbo aron labi pa modaghan ang pamatigayon sa franchising dinhing dapita. (BANAT NEWS)