Enriquez mihimakak sa pasangil

CEBU, Philippines - Gipanghimakak ni Engr. Kenneth Enriquez, hepe sa Department of Engineering and Public Works (DEPW) ang pasangil nga matud pa   wala matrabaho sa siyudad ang mga dalan sa Barangay Agsungot ug Binaliw.

Sumala pa ni Enriquez nga ang unang gihimo sa iyang departamento mao ang pagpalapad una sa karsada isip   unang proseso sa dili pa ayuhon ang maong karsada.

Nagkanayon si Enriquez nga gagmay kaayo ang mga dalan sa maong mga barangay busa kinahanglan nga palapdan kini.

Matud niya nga misamot ang kagagmay sa maong mga karsada gumikan sa pagpanahili sa yuta o landslide nga nahiagoman sa maong mga dapit sa milabay nga mga buwan.

Apan gipasalig ni Enriquez nga sa dili pa matapos kining tuiga hingpit nang mahuman ang trabaho sa pagpalapad sa mga karsada sa duha ka barangay.

Sayo niini si Konsehal Alvin Arcilla maoy mipabuto sa estorya nga matud pa wala pa trabahoa sa DEPW ang maong mga dalan hinungdan nga maglisod pag-agi ang katawhan sa maong mga lugar.

Ang siyudad nangabang og heavy equipment sa kantidad nga P3.2 milyones aron matrabaho ang naguba nga mga kadalanan sa kabukiran ning dakbayan, apan may mga pinalit usab nga mga ekipo ang dakbayan alang ning maong proyekto sumala pa ni konsehal Roberto Cabarrubias.

Si Mayor Michael Rama nagkanayon nga naa karon sa listahan ang mga ayuhonong mga kadalanan sa bukid kay mao kini ang kasagarang mangaguba gumikan sa landslide ug iya kining gipa-monitor kanunay ilabi na niining panahon sa tinguwan. (BANAT NEWS)