CEBU, Philippines - Usa ka 39-anyos nga babaye ang pabiling missing atol ning pagsulat sa balita human kini giingong miambak sa barkong iyang gisakyan kagahapon sa kaadlawon diha sa kadagatan sa Isla sa Camotes gikan sa Surigao City ug paingon dinhi sa dakbayan sa Sugbu.
Ang ginang giingong miyembro sa Philippine Benevolent Missionary Association (PBMA) tuyong miadto unta sa Surigao aron unta magpatambal sa iyang gihambing balatian.
Nakurat nalang ang pamilya sa 39- anyos nga ginang human ang Tv5 maoy mipahibawo sa nahitabo nga miambak kini sa dagat samtang sakay og barko gikan sa Surigao City paingon dinhi sa dakbayan sa Sugbu.
Si Rosita Palomar, inahan ni Maria Grethel Enas daw dili makatuo sa nadawat nga balita. Ang anak nga si Enas dunay tulo ka mga anak ug giingong apil sa nakugang pagkasayod sa balita.
Si Olibo Enas, bana sa na-missing mitug-an nga miyembro sa PBMA ang iyang asawa apan niadtong miaging semana iyang namatikdan nga nausab ang linihokan niini kay magsige nalang og yawyaw kay kuno dunay mopatay kaniya
Si Henry Jomo, kapitan sa maong barko mibanabanang sa kadagatan sa Camotes miambak si Enas apan wala sila dayon mapahibalo maong wala sila makapahigayon og rescue operation, giingong baluron ang maong lugar niadtong higayona.
Sumala pa sa mga report kagahapon, ang mismong mga katupad nga pasahero ni Enas nakamatikod usab sa pagpunay niini og tabi bisan nag-inusara ra apan wala lang nila kini panumbalinga apan pagka-kaadlawon kalit kining miduol sa kilid sa barko dayon miambak sa dagat
Gitug-an sa inahan sa biktima nga midesisyon ang iyang anak nga mobyahe ug moadto sa lungsod sa San Jose sa Dinagat Island aron magpatambal sa sakit niini nga gituohan nga siya gipadautan.
Wala na hinuon modugang pa ang inahan si kinsa ang tambalanan didto sa Dinagat Island nga motambal sa iyang anak.
Giingong daghang tawo ang nangigi sa ilang negosyo gumikan kay mas daghan sila og kustomer sa ilang tindahan ug didto na nagsugod ang sakit sa iyang anak. Kagahapong adlawa padayon ang search and rescue operation sa mga sakop sa Philippine Coast Guard. (R/EIM)(BANAT NEWS)