Capitol uyon arsenio ibalik sa Aklan

CEBU, Philippines - Dakong uyon ang tagdumala sa Cebu Provincial Detention and Rehabilitation Center (CPDRC) nga ibalik sa bilanggoan sa Aklan ang kontrobersiyal nga binilanggo nga si kanhi mayor Alfredo Arsenio sa Lezo, Aklan.

 Mao kini gibutyag ni Capitol consultant on Jail Matters Jose Maria Gastardo ngadto sa mga sakop sa media human mopasabot si Arsenio sa iyang gusto mobalik ngadto sa bilanggoan sa Aklan.

Nasabtan ni Arsenio nga wala na siya hiayoni sa kagamhanan sa lalawigan sa Sugbo diin gumikan sa iyang kasuod sa mga opisyal sa CPDRC, natangtang ang uban sa ilang katungdanan   gikan sa maong prisohan.

Matud pa ni Gastardo nga mas maayo usab nga mabalhin si Arsenio ngadto sa Aklan aron moluag-luag ang kahimtang sa mga piniriso sa CPDRC nga sa pagkakaron naghuot gumikan sa ilang kadaghan.

Nasayran gikan kang Gastardo nga ang CPDRC may kapasidad nga 1,200 ka mga piniriso apan karon nisobra na kini og dul-ang 500 ka mga piniriso kay mikabat naman sa 1, 611 ang tanang anaa nagtingkagol sa maong prisohan.

Sayo niini mihangyo ang Kapitolyo sa korte nga ibalhin sa Cebu City jail   si Arsenio   ug sa pagkakaron nagpabilin pang wala kapakanaugi og desisyon sa korte.

Hinuon may gitakda ang korte nga mediation ugma, Hunyo 15 human supaka sa prosecutor’s office sa dakbayan sa Sugbo sa nahisgutang lakang. Si Arsenio nga nag-atubang og kasong murder didto sa Aklan, dinhi ipapriso sa Sugbo gumikan sa mga rason nga may labot sa siguridad sa ilang kinabuhi. (WC)(BANAT NEWS)