1978—Pormal nga giangkon sa Pilipinas ang Kalayaan Island ug gideklarar kining usa ka lungsod ilawom sa probinsya sa Palawan subay sa kamandoan ni President Marcos, by virtue of Presidential Decree No.1596 . Ang lungsod sa Kalayaan usa ka 6th class municipality nahimutang gibanabanang 340 milya gikan sa Palawan nga duna ray usa ka barangay nga gitawag og barangay Pagasa. Ang maong isla adunay 1.3 kilometrong airstrip alang sa mga abyong militar ug sibilyan. Gilimitahan lang ngadto sa 350 ka tawo ang populasyon niini nga sagad mga mananagat ug sundalo. Makausa sa usa ka buwan adunay modunggong barko sa Philippine Navy nga maghatud og supply sama sa pagkaon ug uban pang kinahanglanon. Aduna kini kaugalingong water-filtering plant, power generators, weather station ug communication tower . Ang maong lungsod aduna nay kaugalingong proyekto sa turismo ug malampuson sa pag-agni og mga negosyante nga mangapital didto.
1867 – Gipanganak si Charles Fabry nga usa ka French physicist nga maoy unang nakadiskubre sa ozone layer. Ang ozone layer mao ang nipis kaayong parte sa kalangitan nga naglibot sa kalibutan nga maoy nahimong proteksyon niini gikan sa ultraviolet light sa adlaw. Siya usab ang midesinyo sa instrumentong interferometer uban ni Alfred Pérot nga gamiton pagsukod sa kinapinohang wavelengths alang sa spectroscopy nga gitawag karong Fabry-Pérot interferometer.