CEBU, Philippines - Napalgang patay na ang usa ka tiguwang masakiton didto sa highway sa barangay Calajoan, lungsod sa Minglanilla, kagahapon sa ala 1:00 sa hapon.
Ang wala nay kinabuhi nga giingong masakiton og baga mao si Alfredo Jimenez, 88, biyudo, nga lumad nga taga lungsod sa San Fernando.
Sa pakighinabi sa Banat News ni PO2 Avelino Selliorta sa Minglanilla Police Station nasayran nga si Jimenez kanunay nga mag-inusara nga muadto sa Minglanilla District Hospital (MDH) aron magpaaso alang sa iyang sakit nga tuberculosis (TB).
Atol usab sa pasiunang imbestigasyon ni PO2 Selliorta, nasuta gikan sa guwardya sa MDH nga ang maong tiguwang miadto sa hospital sa sayo kagahapon sa buntag kay nagpaaso.
Apan sa pagka-ala 1:00 sa hapon nakit-an nalang sa mga molupyo sa duol sa MDH nga nagbuy-od na ang biktima sa daplin sa karsada nga wala nay kinabuhi.
Ang kapolisan nga miresponde sa maong alarma dali nga midala ni Jimenez ngadto sa MDH apan kini gideklarar nga dead on arrival.
Gituohan sa kapolisan nga ang sakit niya sa lawas maoy hinungdan sa iyang kamatayon. (WC)(BANAT NEWS)