CEBU, Philippines - Namatay ang usa ka ex-convict human kini pusila samtang naglakaw sa Unit 5, Oprra, barangay Kalunasan, dakbayan sa Sugbo kagahapon sa buntag.
Ang biktima kinsa giingong bag-o lang nakagawas gikan sa Cebu City Jail tungod sa kasong theft mao si Hermiginio Secretales III alyas “Dongkie”, 32, nga taga Unit 1, Oprra sa nahisgutang barangay.
Sa imbestigasyon sa kapolisan nasayran nga si Secretales nalambigit usab kini sa kalihukan ilegal nga drugas.
Si Secretales wala makabantay sa nag-inusarang mamumuno nga nagsunod kaniya ug kalit lang siyang gipusil niini.
Human mahagba sa karsada ang biktima giingong kalma kaayong milakaw pahilayo sa maong lugar nga mibiya sa biktima nga nagbuy-od sa daplin sa karsada nga naglunang sa iyang dugo.
Si Secretales kinsa nakaangkon og samad pinusilan sa iyang buko-buko ug tuong bukton daling gidala sa mga tanod sa barangay, nga gipangulohan ni Ben Calumpiano ngadto sa Cebu City Medical Center apan pila ka minuto ang nakalabay nakabsan kini sa kinabuhi.
Napunitan sa kapolisan gikan sa lugar nga nahitaboan ang upat ka kabhang sa kalibre .45 nga pistola.
Ang kapolisan aduna nay gisundan karon nga suspetsado sa maong hitabo ug usa sa ilang gitutokan nga motibo niini ang kabahin sa ginadiling drugas. (/WC)(BANAT NEWS)