CEBU, Philippines - Patay ang usa ka 31-anyos nga lalaki kinsa giingong kanhi nalambigit sa pagpangawat og motor ug sakyanan human kini pusila sa wala mailhing mamumuno samtang naglakaw sa sitio Baracca, barangay Poblacion II, dakbayan sa Carcar niadtong Sabado sa tungang gabii. Ang biktima mao si Alfredo Alquiser Jr., 31, residente sa nahisgutang dapit, nakaangkon kini og duha ka samad pinusilan sa iyang ulo ug dughan wala na makaabot nga buhi ngadto sa Carcar Provincial Hospital.
Si PO2 Rosendo Binondo, imbestigador sa Carcar City Police Station mibutyag nga sa wala pa mahitabo ang pagpamusil si Alquiser gikan kini nagpalit og sigarilyo dihang usa ka wala mailhing tawo kalit lang mitungha ug mipusil sa biktima.
Ang mga polis walay na-recover nga mga ebidensiya gikan sa lugar nga nahitaboan.
Usa sa gidudahan sa kapolisan nga motibo sa maong krimen ang kabahin sa giingong pagkalambigit ni Alquiser sa carnapping sayo ning tuiga apan mi-withdraw sa kaso ang reklamante. (BANAT NEWS)