CEBU, Philippines - Usa sa tulo ka mga tulisan nga mitulis sa mga pasahero sa usa ka jeepney niadtong Biyernes sa gabii diha sa barangay Bulacao, dakbayan sa Talisay ang nadakpan kagahapon sa buntag sa gipahigayong follow-up operation sa mga polis.
Ang nadakpan diha sa ilang balay sa sitio Cabancalan 2, barangay Bulacao Talisay mao si John Ryan Gardaban Abarquez alyas “Starter”, 18. Na-recover gikan kang Abarquez ang usa ka Acer Netbook nga gipanag-iya sa biktimang si Lyn Solon, 26, taga Likpa Linao, Talisay, maestra sa usa ka Korean school. Laing biktima mao si Lysa Antonette Dejan, 24, taga Bayong, Minglanilla, maestra usab sa Korean school nga nakuyapan tungod sa kahadlok pagtion og kutsilyo sa tulisan. Nakuhaan siya og backpack nga gisudlan sa iyang cellphone, PRC ID, mga alahas ug cash. Lakip sa mga biktima sila si Jane Martha Almacen, 22; Angelita Mangala, 28; Cailrous Cañenero, 22; ug Reggie Polinar, 30, pulos mga taga Minglanilla ug nakuhaan og mga cellphone, pitaka ug mga salapi.
Si Abarquez wala miangkon sa salaod apan wala mobutyag sa mga pangalan sa kauban. Gikatakdang pasakaan kini og kaso ugmang adlawa. (BANAT NEWS)