Kolektor nag-sideline pamaligya'g shabu nadakpan

CEBU, Philippines - Usa ka kolektor ang gidakop sa kapolisan human gikatahong nasakpang nag-sideline pud diay pagpamaligya og ilegal nga drugas diha sa sitio Banacod sa barangay Lapuresima siyudad sa Bogo niadtong Biyernes sa hapon.

Ang nadakpan mao si Inigo Sumayang Dionila, 37, giingong kolektor sa usa ka inilang appliance center nga dunay sangay sa maong dakbayan ug diin madestino ang suspek.

Si Dionila nadakpan sa buybust operation nga gihimo sa Bogo Police Station pinangulohan ni Chief Insp. Ceferino Tabay Jr. ug nakuhaan siya og 20 ka paketeng dunay sulod nga gituohang shabu ug P150 nga marked money ingon man laing P5,570 nga gituohang halin sa pagpamaligya niini og gidiling drugas.

Matud ni PO3 Allan Dosdos ang imbestigador sa Bogo City Police dihang nahinabi sa Banat News pipila ka semana nilang gipanid-an ang suspek tungod sa report nga nag-sideline kini pagpamaligya og shabu.

Gamit ang bag-ong nadestinong polis sa Bogo gipahigayon ang buybust operation sa gawas sa balay sa suspek ug dihang gitunolan niini og drugas ang maong polis dali kining gisikop.

Atol sa pagrekisa nakuhaan kini sa iyang posesyon og laing 19 pa ka paketeng pulos may sulod nga gidudahang shabu ug kwarta nga P5,570. (BANAT NEWS)