VM Dotillos gitangtang sa pwesto tungod sa grave misconduct

CEBU, Philippines — Gitangtang sa Office of the Ombudsman si Borbon, Cebu Vice Mayor ug kanhi Mayor Noel T. Dotillos tungod sa grave misconduct gumikan sa pagkuha sa serbisyo sa iyang retiradong asawa isip consultant nga walay pagtugot sa Sangguniang Bayan.

Sa desisyon nga gipetsahan Oktubre 15, 2025, gimandoan usab ang pagkansela sa iyang eligibility, pagbawi sa mga benepisyo sa pagretiro gawas sa leave credits, ug permanente nga pagdili kaniya sa pagbalik sa serbisyo sa gobyerno.

Apan gibasura sa Ombudsman ang reklamo nga nepotismo tungod sa kakulang sa igo nga ebidensiya.

Ang kaso may kalabotan sa pagpadayon sa pagkuha sa serbisyo ni Dr. Corazon V. Dotillos, kanhi municipal health officer sa Borbon, human sa iyang mandatory retirement sa edad nga 65 niadtong Oktubre 5, 2021.

Sumala sa Ombudsman, nagpadayon ang munisipyo sa pagkuha sa iyang serbisyo isip consultant pinaagi sa mga contract of service gikan Oktubre 18, 2023 hangtod Oktubre 18, 2024 nga walay naunang pagtugot sa Sangguniang Bayan.

Giingong nakalapas kini sa Section 22(c) sa Republic Act 7160 o Local Government Code, nga nagkinahanglan og naunang pagtugot sa lokal nga lehislatura alang sa pipila ka kontrata nga sudlan sa local chief executive.

Gihimakak ni Dotillos ang mga alegasyon ug miingon nga gikinahanglan ang serbisyo sa iyang asawa tungod kay walay laing doktor nga gustong mopuli kaniya.

Matud pa niya, gisuportahan usab sa resolusyon sa Sangguniang Bayan ang pagkuha sa serbisyo niini.

Bisan pa niini, nakit-an sa Ombudsman nga walay igo nga pamatuod sa nepotismo tungod kay ang mga consultant dili sakop sa maong pagdili ubos sa lagda sa Civil Service Commission.

Tungod sa pagtangtang kang Dotillos, posibleng manumpa isip bag-ong bise mayor sa lungsod si Municipal Councilor Brino Sepulveda, isip numero unong konsehal sa Borbon.  MEL BANAT NEWS