CEBU, Philippines - Duha ang angol nga naglambigit sa usa ka polis human magkadinasmagay ang duha ka motorsiklo nga ilang gisakyan didto sa barangay Dumlog, dakbayan sa Talisay kagahapon pasado alas 12:00 sa tungang gabii.
Ang mga biktima mao si SPO2 Elmer Saladas, nga taga barangay Linao, lungsod sa Minglanilla ug kasamtangang nadestino sa Talisay City Police, ug si Donaldson Tanoc, hingkod, nga taga barangay Pooc, sa maong dakbayan.
Sa pakighinabi sa Banat News ni PO1 Rosauro Pasumala sa Talisay City Traffic nasayran nga samtang nagpadagan si Saladas sa iyang motor, pag-abot sa nahisgutang lugar nasugatan niini ang motorsiklo ni Tanoc nga mi-overtake sa gisundan nga sakyanan niini.
Maoy hinungdan nga nagdungan sila og kalagpot gikan sa ilang mga sakyanan.
Nagdungan usab sila og bangon ug silang duha nalandig sa Talisay City District Hospital.
Apan matud pa ni Pasumala nga pulos gibalhin sa tambalanan sa dakbayan sa Sugbo ang mga biktima. - BANAT NEWS