Gisaka sa balay gipatay

CEBU, Philippines - Patay ang usa ka 41- anyos nga minyo human kini gisaka sa iyang pinuy-anan sa duha ka mga lalaki ug gitabangan og pagpusil hangtud nga namatay samtang nagkaon sa iyang panihapon sa barangay Lawaan-2 siyudad sa Talisay niadtong Domingo sa alas 6:15 sa gabii.

Ang biktima mao si Larry Dela Torre, 41, lumad nga taga Guilhulngan Negros Oriental ug nagpuyo na sa maong lugar.

Samtang duha ka mga lalaki nga nagsakay og motorsiklo ang gitumbok sa mga nakasaksi nga responsabli sa kremin.

Nasayran gikan sa radio operator sa Talisay City Police Alex Manabat pinaagi sa imbestigasyon nila ni SPO1 Mickey Espina nagpakita nga ang biktima nagkaon og panihapon sa iyang balay dihang kalit nga nanulod ang mga mamumuno ug gipusil kini.

Human makita niini nga nabulit sa samad pinusilan ang biktima diha pa nagdaling nanaog ang mga gikatahapan ug nanakay sa gibiling motorsiklo ug miikyas padulong sa direksyon sa dakbayan sa Sugbu. Ang nirespondeng pulis naka-recover og duha ka kabhang sa bala sa kalibre .45 ug laing usa ka deformed slug.

Ang biktima gisuwayan pa unta og dala sa Talisay City District Hospital apan gideklarar nga patay na kini.

Ang kapulisan padayon pa sa pagsusi sa motibo ug sa pag-ila sa mga kriminal. (/EIM) - BANAT NEWS