Capitol mopalit og electric vehicles

CEBU, Philippines - Nagplano si Gobernador Gwendolyn Garcia pagpalit og electric vehicles alang sa kabarangayan, kalungsoran ug mga siyudad sa lalawigan sa Sugbo.

Natawo ang maong laraw sa gobernador human sa   presentasyon nga gihimo sa presidente sa Gerweiss Motors Corporation   nga si Sean Gerard Villoria ug Tomonori Kimura, ang presidente usab sa Moving Ecology Corporation sa nahisgutang klase sa mga sakyanan, usa na niini ang E-TRIKE.

Ang maong mga kompaniya maoy nagpabrika  niining mga sakyanan nga padaganon pinaagi sa kuryente.

Si Villoria mihangop sa tinguha ni Gobernador Garcia nga mopalit ning maong matang sa sakyanan aron makapahimulos ang mga Sugboanon niini .

Ang maong matang sa sakyanan padaganon na lamang pinaagi sa bateriya ug dili na pinaagi sa gasolina.

Ang gobernador miawhag sa nahisgutang mga magpapatigayon pag-andam og proposal nga maglakip sa makiangayon nga presyo sa maong mga electric vehicles   alang sa mga Sugbuanon.

 Sayo niini nang-apud-apod na ang gobernador og mga Multicab sa kabarangayan, kalungsoran ug mga siyudad   sa tibuok lalawigan sa Sugbo   nga magamit sa panahon sa emerhensiya.

Alang sa gobernador nga kun may supply na sa electric vehicles, dako kaayo kini og ikatabang sa ekonomiya sanglit wala na kini magkinahanglan og sugnod nga gasolina.(/WC)    (BANATNEWS)