CEBU, Philippines - Usa ka security guard mipusil sa iyang kainom gumikan lang sa cell phone nga naguba kay nayab-an og beer didto sa sitio Gisi, barangay Agus, dakbayan sa Lapulapu sa miaging kaadawon.
Ang biktima mao si Edgardo Villamor, 21, ulitawo, nga nagpuyo sa maong dapit, samtang ang suspetsado nailhan lang sa ngalang Tinor nga guwardiya sa usa ka establisemento sa maong dapit.
Si SPO1 Allan Pantaleon sa homicide section sa kapolisan sa maong dakbayan nga nahinabi sa Banat News miingon nga sa wala pa ang pagpamusil, nag-inom ang biktima ug ang suspetsado sa usa ka tindahan sa maong dapit.
Gumikan kay hubog, kurog na kaayo ang kamot sa suspetsado nga mitagay sa beer ug imbis adto sa iyang baso ibubo, didto kini iyabo sa cell phone sa biktima hinungdan nga napawong ang maong cell phone .
Gumikan sa kalagot mihiwasa ang biktima ug gisumbag ang suspestado.
Midagan ang suspetsado ngadto sa giguwardiyahan niyang establisemento apan mibalik kini nga nagbitbit na sa iyang service firearm busa mikabad usab og dagan ang biktima aron unta sa pagpahilayo sa maong dapit.
Apan gigukod kini sa suspetsado ug gipusil ang paa busa nalup-og ang biktima sa yuta nga nagkadugo.
Sa pagtuo sa suspetsado nga namatay ang biktima , mikabad kini og dagan pahilayo sa maong lugar ug hangtod karon gipangita pa sa kapolisan.
Samtang ang biktima gihatud dayon sa tambalanan sa dakbayan sa Lapulapu. (BANATNEWS)