CEBU, Philippines - Gihatagan og ultimatum kutob sa Hunyo ang pagpabilin sa mga balay nga gitarok sa daplin sa kasapaan sa dakbayan sa Mandaue nga peligro sa mga baha ug human niini ang kagamhanan na sa maong syudad maoy modemolis kanila.
Si Cynthia Suico sa community service sa Housing on Urban Development Office (HUDO) sa maong dakbayan nagkanayon nga igo na kaayo ang gihatag sa kagamhanan nga lugway nga panahon sa mga hingtungdan ug dili na sila makamahay kun bungkagon ang ilang kabalayan lapas sa Hunyo.
Matud pa niya nga sukad pa sa miaging tuig gipapahawa na sa kagamhanan ang maong mga molupyo aron dili mamiligro ang ilang kinabuhi sa panahon sa tingbaha.
Hinuon nagkanayon si Suico nga mokabat na sa 30 ka pamilya ang miuyon nga mobalhin ngadto sa relocation site sa barangay Paknaan ug daghan usab kanila ang midawat sa balik probinsiya program sa kagamhanan. (BANATNEWS)