CEBU, Philippines - “Ayaw og deny!” Mao kini ang mensahe ni Cebu City treasurer Ofelia Oliva ngadto kang Stephen Ybañez kinsa mihimakak sa pasangil niya nga matud pa nga gisinghagan niini ang anak nga si Karen sa gihimong operasyon sa Task Force Alpha sa miaging semana.
“Wala man nay problema ba kung nakabuhat og violation ang akong anak. Andam man siya moatubang sa penalty pero ang ako lang, dili lang na unta mag-arogante. Pag-abot nako, gisinghagan sad ko og apil, wala gyud siya’y (Ybañez) respeto!,” sumala pa ni Oliva.
Dugang pa ni Oliva nga gipatun-an na niya karon ang posibleng kaso nga iyang ipasaka batok ni Ybañez ug iyaha gyud kining tinud-on aron makaamgo kini sa pagkaarogante niini.
Sumala pa niya ang usa ka law enforcer kinahanglang dili arogante ug matinahuron sa pag-implementar sa balaod.
Gikalipay usab ni Oliva ang gibuhat karon sa regional director sa Land Transportation Office-7 nga si Raul Aguilos kinsa mipaimbestigar sa maong insidente.
“Bilib kaayo ko sa gibuhat ni Aguilos, kay diha nato makita kung kinsa ang nagsulti sa tinuod,” matud pa ni Oliva.
Giklaro usab niya nga wala siya gasalig sa iyang posisyon ug iya kini nga gibuhat gumikan kay nasakitan siya sa nahitabo sa iyang anak.
“Pagtawag sa akong anak, niana ko nga kung duna siya’y nabuhat nga violation, ipakita lang ang iyang lisensiya. Pero nakuyawan nako kay naghilak naman ang akong anak ug niana (nisulti) nga gitapokan na daw siya og unom ka tawo,” sumala pa ni Oliva.
Una na nga gibutyag ni Aguilos nga adunay katungod nga mopasaka og kaso ang kampo ni Oliva batok kang Ybañez.
Samtang si Mayor Michael Rama nagdumili sa paghatag og komento sa maong insidente ug iya kini nga gitugyan ngadto sa awtoridad. BANAT NEWS