Di paghikap sa butanding gibalaod

CEBU, Philippines - Higpit nang dili mahikap ang mga whale shark o butanding sa lungsod sa Oslob karong naaprobahan na sa hunta probinsyal ang ordinansa sa lungsod sa Oslob nga nagprotiher niini.

Sa maong ordinansa gipalapdan sa kagamhanan ang pagprotiher sa tanang may kinabuhi ilawom sa kadagatan Oslob ilabi na ang butanding.

Ang mga whale sharks sa maong lungsod nainila na sa tibuok kalibotan ug gidugok sa mga langyaw ug lokal nga turista matag karon ug unya.

Gumikan niini dako kaayo og gikatabang ang maong matang sa isda nga talagsaon kaayong mitumaw sa kadagatan lang sa Oslob hinungdan nga giampingan kini pag-ayo sa kagamhanan sa Oslob. Human ma-review sa committee on laws and ordinances sa provincial board ang ordinansa  nga giduso kanila sa konseho sa Oslob, ilabi kini giaprobahan aron ikapatuman na ang sulod sa maong balaod ngadto sa tanang motan-aw sa mga butanding sa kadagatan sa maong lungsod. (BANAT NEWS)