CEBU, Philippines - Usa ka 60-anyos nga lolo ang naswertihan tungod sa pagkagar sa armas sa lalaking buot untang mopatay kaniya ug igo nalang siya niini gikulata ug pagkahuman gipasawom sa kanal. Ang maong insidente nahitabo sa barangay Canjulao, dakbayan sa Lapulapu sa miaging hapon diin usa ka Benedicto Baring, taga barangay Gun-ob sa maong dakbayan nakaangkon og mga bun-og sa ulo ug kalawasan ug nahumod sa lapok.
Ang biktima mitumbok sa usa ka Leonardo Mabano, 39, nga nagpuyo sa maong dapit ug nadakpan sa kapolisan human sa ginukdanay.
Si PO2 Carlos Barluado sa Homicide Section sa kapolisan sa maong siyudad nga nahinabi sa Banat News miingon nga paingon na untang maligo sa poso ang biktima apan gisugat kini sa suspetsado ug gipusil unom ka higayon.
Matud pa ni Barluado swerteng wala kini makabuto, ug sa kasuko sa suspek gibukbok nalang niini sa puloan sa .38 kalibre rebolber ang agtang sa biktima dayong mando sa pagkamang sa lapok, duna say miingon nga gipaambak sa suspek ang biktima diha sa atabay.
Pipila ka mga residente ang daling nakatawag sa kapolisan hinungdan sa nahitabong ginukdanay ug pagkasikop sa suspek.
Ang biktima nga nakabaton og samad sa agtang dali nga gidala sa tambalanan sa Lapulapu City Hospital ug gitakda kining mopasaka og kaso sa suspetsado.
(BANAT NEWS)