Sakop sa PDEA gipasalbahan

CEBU, Philippines - Ang mga sakop sa Philippine Drug Enforcement Agency (PDEA) gipabuthan sa mga drug addict atol sa ilang pagronda batok sa usa ka ilado na kaayong drug pusher sa barangay Tejero, dakbayan sa Sugbo kagahapon sa hapon.

Sa report sa ABS-CBN TV Patrol Central Visayas gibutyag ni Regional Director   Jigger Montallana sa PDEA7 nga sa ilang pagsum-ok sa maong lugar gipabuthan sila sa nagbantay sa maong lugar sa mga drug addict nga ginganlan nila og drug spotter hinungdan nga wala sila makasulod sa balay sa ilang dakpunon.

Apan nasakmit nila ang 43 ka peketeng shabu gikan sa mga kamot ni Rolando Amestoso nga maoy giingong sinaligan sa nahisgutang drug pusher kinsa nakaikyas sa maong pagpangronda.

Gibutyag ni Montallana nga mibawos usab sila sa pagpabuto hinungdan nga puwerting lisanga sa mga tawo sa maong lugar.

Gawas niini naabtan sa PDEA ang pito ka mga giingong manuyopay og shabu nga kasagaran mga drayber sa PUJ, konduktor ug drayber sa v-hire.

Midugang si Montallana nga sayo niini nakadawat sila og reklamo gikan sa mga kadagkoan sa simbahan sa maong dapit kinsa miingon nga matag gabii may mga PUJ nga moparking sa ilang lugar kansang mga drayber ug konduktor mosulod ngadto sa Villagonzalo 2 aron mosuyop og shabu.

Dugang pa niya nga ang suspetsadong amahan ug anak nga giingong level three nga drug pusher daan na nga anaa sa ilang watch   list. (BANATNEWS)