Armas sa 11 anyos nga kriminal gisurender

CEBU, Philippines - Gisurender niadtong Domingo   sa inahan ang armas nga gigamit sa iyang 11 anyos nga anak sa pagpusil sa 13 anyos nilang silingan sa sitio Lawis, barangay Suba niadtong Sabado sa hapon.

Ang maong armas nga .38 kalibre nga revolver anaa na karon sa kustodiya sa kapolisan sa San Nicolas Police Station.

Ang pagtahan sa maong armas nahimo human pahinumdomi sa kapolisan ang maong inahan nga ang kapakyas niini pagpatahan sa iyang bana uban sa iyang anak nga nakapusil mosangpot sa kabug-at sa kaso nga atubangon sa mga hingtungdan.

Nasayran nga ang maong armas giingong nawagtang sa lugar nga nahitaboan human sa aksidente nga pagkaigo sa ulo sa 13 anyos nga biktima.Ang inahan sa onse anyos nga suspetsado sa pagpamusil gipugngan dayon sa kapolisan human molayas ang anak ug ang amahan niini human sa maong hitabo.

Si PSr. Insp. Jun Mohammad Jamiri, hepe sa Homicide Section sa Cebu City Police Office nagkanayon nga wala pa nila matino kung diin makuha sa inahan sa suspek ang armas.

Kini samtang sumala sa maong inahan nga hangtod kagahapon wala pa niya hisayri kun hain paingon ang iyang anak ug bana

Apan si Jamiri miingon nga adunay nakasulti kanila nga ania  ra sa dakbayan ang amahan ug anak nga ilang gipangita.

Busa gisangpit ni Jamiri ang amahan nga itahan na niini ngadto sa kapolisan ang anak niyang nakapusil kay ila kining estoryahon.

Tungod sa balaod dili kapasakaan og kiha ang maong menor de edad hangtod nga makaabot kini og 18 anyos base sa balaod.

Sa samang higayon gitataw ni Jamiri nga kung mapamatud-an nga nakalapas sa balaod ang amahan gumikan sa pagtago niini sa suspek mahimong mapasakaan kini og tukmang kaso.

Lakip nga mag-atubang og kaso sa hukmanan mao ang tag-iya sa armas nga gigamit sa suspek sa pagluthang sa biktima.

Gibutyag ni Jamiri nga stable na karun ang kahimtang sa biktima human kini ipaubos sa surgical operation sa Cebu City Medical Center (CCMC).

Si Boy ,13, dili tinuod nga ngalan naigo sa ulo human kini masabak sa usa ka bala sa armas nga gigamit ni Lito, 11, dili usab tinuod nga ngalan kinsa aksidente nga mipusil sa biktima didto sa bilyaran sa sitio Lawis, Suba sa miaging Sabado sa hapon. ( /WC)  - BANAT NEWS