CEBU, Philippines - Nalandig sa Carcar City District Hospital ang tulo ka tigulang ug siyam ka mga bata human sila malanag sa gikaong nilutong ‘binangkal’ sa miaging gabii.
Ang mga nalanag mao sila si Cristita Bernabe, 69, nga maoy miluto sa binangkal; Zenna Jhedes Bernabe, 2; Brian Kim Bernabe, 22; Alyssa Kim Alipoyo, 20; Lady Love Dela Peña, 9; Daryl Genyas, 11; Ian Genon, 7; Andri Japit Genon, 9; Khenjee Alinsonoren, 12; John Icey Genayas, 12; Calnesin Mancao, 15; ug Blessri Mae Dela Cerna, 13.
Sumala pa nga ang apohan sa mga bata nga si Cristita maoy nagluto sa maong binangkal nga hinimo sa harina, baking soda, sentral (asukar nga pula); lunga ug mantika nga iyang pinalit sa usa ka tindahan nga nahimutang sa syudad sa Carcar. Matud pa ni Cristita nga nahinabi sa Banat News nga nagluto siya og binangkal tungod kay aduna siyay order nga 60 ka buok sa duha niya ka suki.
Ang sobra sa gi-order iyang giapod sa iyang mga apo nga diha sa ilang panimalay ug lakip usab siya ang mikaon niini apan dangtan ang pipila ka oras ang milabay nangalipong silang tanang nakakaon.
Hasta ang mga bata giingong mireklamong nagsakit ang tiyan ug naglipong-lipong ug nagsukasuka hinungdan sa ilang pagkaluya ug sa kahadlok nagpahatud sila sa Carcar City District Hospital.
Dugang usab ni Cristita nga wala siyay nakitang hinungdan nga malanag sila sa maong pagkaon tungod kay dugay na siyang tiglutoan niini sukad pa sa bata pa ang iyang mga anak.
Apan gibutyag ni Cristita nga sa dihang iya nang gisagol ang mga sagol nakabantay siyang nagtibugol ang harina apan wala niya panumbalinga.
Samtang ang Chief of Hospital sa Carcar City District Hospital nga si Dr. Prudencio Manubag mibutyag sa Banat News nga base sa gipakitang reaksyon sa mga biktima nangahilo gyud sila apan ‘mild’ lang kini.
Apan matud pa niya dako og natabang nga sayo pa gidala na sila sa tambalanan ug wala na makaapekto pa sa tibuok lawas ang nakalanag kanila.
Gihulagway usab ni Manubag nga ang posibleng ang hinungdan sa pagkalanag nila mao ang kontaminasyon sa harina o sa baking powder.
“Contamination ra gyud ang posible ato nga gidudahang hinungdan, it’s either sa harina o sa baking powder,”pasabot pa ni Manubag.
Kasamtangan karun nga gipaubos sa eksaminasyon ang sample sa binangkal nga hinimo ni Cristita sa Provincial Health Office. (EIM) (BANAT NEWS)