ILOILO CITY, Philippines --- Patay nang napalgan ang 68-anyos nga asawa sa usa ka Regional Trial Court judge ug ilang babayeng apo nga dunay mga samad dinunggaban sa ilang kalawasan kagahapon sa buntag sa sulod sa gipanag-iyang pension house sa Brgy. Ilaya, Barotac Nuevo, Iloilo.
Giila ang mga biktima mao sila si Sonia Amular, asawa ni Judge Daniel Antonio Amular sa RTC Branch 21 sa Mambusao, Capiz, ug ang 17-anyos nilang apo nga si Rubylin Deloso, nga bag-ohay pang mitapos sa high school.
Usa ka trabahante nga si Milo Guanzon maoy nakakita sa wala nay sapot nga patay’ng lawas ni Deloso diha sa kasilyas. Si Guanzon usab ang nanawag pagpangayo og tabang. Sunod nilang nakit-an ang patay’ng lawas ni Amular diha sa garden nga nagsuot pa og botas.
Nagtuo ang Nuevo Police Station nga posibleng nag-atiman sa iyang mga tanom si Amular dihang kini gipatay, samtang gisusi usab sa kapolisan ang posibilidad nga gilugos o naligo si Deloso dihang naabtan sa mamumuno. Gituohang nahitabo ang krimen niadtong Domingo sa hapon.
Si Insp. Fangena miingon nga si Amular nakaangkon og walo ka samad dinunggaban ug gibunalan og gahi nga butang samtang si Deloso adunay 20 ka samad dinunggaban sa lawas. Nasuta usab nga walay nawalang butang sa mga biktima, gituohan usab nga nag-inusara ra ang kriminal.
Wala si Judge Amular atol sa hitabo sanglit atoa kini sa ilang balay sa siyudad tungod kay sagad kining mangandam sa iyang biyahe padulong sa Mambusao matag Domingo alang sa iyang trabaho.
Si Senior Supt. Gil Lebin, Iloilo Police director, miingon nga gikonsiderar nilang posibleng personal nga away o ang pagpanglugos ang motibo sa krimen. - BANAT NEWS