Nagbarug sa karsada gipusil patay

CEBU, Philippines - Namatay dihadiha ang usa ka lalaki human kini pusila sa wala hiilhing kriminal didto sa Juan Luna Extension sa barangay Poblacion, dakbayan sa Danao sa miaging gabii.

Ang biktima mao si Rechie Diquina, 39, way trabaho nga nagpuyo sa maong lugar. Sumala ni SPO2 Ildefonso Prosia sa Danao Police Station nga nasayran nila ang hitabo pinaagi sa usa ka tawag sa telepono gikan sa mga molupyo nga nakasaksi sa maong hitabo.

Si PO3 Renato Preto sa kapolisan sa maong dakbayan kinsa maoy mitubag dayon sa alarma nagkanayon nga nagbarug-barog sa daplin sa karsada dili kaayo layo sa ilang balay ang biktima dihang kalit lang giluthang sa wala hiilhing kriminal. Nasabak sa tuong bahin sa liog ug diha-diha nabugtoan sa kinabuhi ang biktima.

Nasayran gikan kang Prosia nga usa ka drug addict ang biktima, nadakpan na nila kini sa milabay’ng tuig.

Matud pa niya nga kanunay’ng kulatahon sa biktima ang manghod niini ilabi na kun anaa na kini sa kalipong sa gidiling drugas.

Sa pagkakaron padayon pang gipangita sa kapolisan ang kriminal kinsa nakasibat dayon human sa hitabo.   - BANAT NEWS