Abag kabanay ipatuman sa Urban Poor
CEBU, Philippines - Ang federation sa urban poor sa dakbayan sa Talisay gitakdang moimplementar sa “Abag Kabanay Program” aron makahipos og pundo nga tawgong bereavement fund aron ihinabang pinansiyal sa pamilya sa miyembro niining namatay.
Si Alex Gabi, kalihim sa grupo mibutyag nga ang guideline niining maong programa gitakdang aprobahan sa sunod nga tigom sa Federation of Talisay City Urban Dwellers Association, Inc. (FETCDA).
Gibutyag niya nga ubos sa guideline sa maong programa matag legal nga asawa o bana sa miyembro sa FETCUDA nga namatay makadawat og P10 nga amot sa matag miyembro isip burial assistance.
Ang FETCUDA may kapin sa 6,000 ka mga miyembro.
Si Konsehal Dennis Basillote, chairman sa council committee on Urban Poor nagkanayon nga mga P90,000 ang katibuk-ang ikahinabang sa organisasyon ngadto sa pamilya nga mamatyan.
Si Basillote maoy utok sa maong plano bahin sa bereavement fund sa Urban Poor nga iyang gipadayag atol sa annual solidarity week sa urban poor niadtong Disyembre sa milabay’ng tuig. Ang konsehal mipasalig nga ang iyang buhatan mohatag usab og counterpart nga hinabang sa FETCUDA. BANAT NEWS
- Latest
- Trending
