CEBU, Philippines - Namatay ang usa ka mananagat human matabas ang ulo ug tiyan niini sa palabad sa pumpboat didto sa fishport sa sitio Talisay, barangay Punta, lungsod sa San Remegio sa miaging gabii.
Ang biktima mao si Quirico Servantes, 38, lumad nga taga barangay Guiwanon, lungsod sa Bantayan Island.
Sa pakighinabi sa Banat News sa imbestigador nga si PO3 Alfredo Mandal sa San Remegio Police Station, nasayran nga sa wala pa ang hitabo, si Mario Batoy nga kapitan sa MV Rosalinda V fishing boat mimando sa iyang mga tripulante nga ipahulog na ang angkla kay hapit na sila modunggo.
Apan giingong nasangit ang angkla sa palabad sa sakyanan nga nagtuyok hinungdan nga si Batoy mimando sa boat engineer sa pagpawong una sa makina aron makuha ang angkla nga nasangit ug ang biktima maoy gisugo niini sa pagtangtang sa angkla gikan sa palabad.
Apan tungod kay nagtuyok pa ang palabad sa sakyanan kay wala dayon mapawong sa engineer, natabas ang ulo ug tiyan sa biktima nga maoy hinungdan sa hinanaling kamatayon niini.
Gidala pa sa mga kauban ang biktima sa tambalanan apan gideklarar kining patay na sa paghiabot didto.