Nahimong 2 ang patay sa nalusnong koral

CEBU, Philippines - Nahimong duha  ang  nakabsan  sa kinabuhi sa trahedyang pagkalusno sa sementadong koral   sa Casa del Rio Subdivision sa barangay Talamban siyudad sa Sugbo sa milabay’ng gabii dihang ang  gideklarar  nga missing naugkat nga patay na kagahapon  sa udto.

Si Talamban barangay Captain Jesus Remedio maoy  mikonpirmar   sa Banat News  kinsa  nagkanayon   nga si Nestor Tapdasan, hingkod, kinsa wala igkita sa pagkahunlak  sa koral, naugkat gikan sa midat-og  kaniyang  mga  semento nga wala nay kinabuhi.

Ang unang namatay mao si Allan Oporto alyas Tirra sa pagkalusno gayud  sa koral samtang  didto  kini  sa sulod  sa ilang  balay  sa maong  higayon.

Matud ni kapitan Remedio nga ang mga kabanay sa namatyan gipasaligan nga makadawat og tag P10 mil  gikan sa Department of Social Welfare and Services (DSWS).

Kagahapon sa buntag nakigtagbo kang  Remedio ang liaison officer sa Commonwealth Development  nga si Alvin Grepaldijo aron asikasuhon ang mga panginahanglan ilabi na sa mga apektadong pamilya.

Matud ni  Remedio may laing lima nga naangol sa hitabo ug tulo usab ka pamilya ang kasamtangang gipabakwit sa Sports Complex sa barangay human ang maong lugar gi-koral karon sa   kapolisan.

Samtang  gihimakak  ni Remedio ang pasangil  nga wala  kuno  siya  mohimo og  lakang  aron  dili  maamong  ang  mga  molupyo  sa maong  lugar  gikan  sa gabok  na  nga koral  sa subdivision. Matud  pa  ni Remedio  nga wala  siya magkulang  sa pagpahinumdom sa mga molupyo  nga  usa ka danger zone  ang maong  lugar.

Apan  luyo  sa iyang awhag  nga pabakwiton  ang mga molupyo, wala  gyud  kini maminaw kaniya.

Samtang  ang konseho  sa dakbayan  sa Sugbo  mopasar og resolusyon nga  magmando   sa city engineer sa pagsusi  sa klase  sa yuta  nga natarokan  sa  koral  nga nalusno.

Si Konsehal Alvin Arcilla  maoy nanghingusog  nga maeksamin  ang  yuta  sa Casa del Rio subdivision  aron masiguro  nga luwas  ang  mga namuyo  niini. - Rey Pasaporte, Darrel A. Carumba, Brenda D. Batuto  ug  Jessica Handumon, CNU Communication Intern/WC (BANAT NEWS)