CEBU, Philippines - Si Ombudsman Conchita Morales andam nga motestimonya atubangan sa impeachment court kalabot sa $10 milyones nga gideposito ni Chief Justice Renato Corona sa iyang bank accounts.
Sa report sa ABS-CBN nasayran nga ang pamahayag ni Morales sa pagtestigos bahin sa maong katigayonan ni Corona nahimo human siya subpenahi sa impeachment court.
Sayo niini ang abogado sa depensa nga si manlalaban Judd Roy maoy mihangyo sa impeachment court nga paluwatan og subpena si Morales aron ipamatuod niini nga si Corona may hiniposang 10 milyones ka dolyar sa bangko.
Gawas kang Morales, pasubpenahan usab sa impeachment court ang ubang mga testigos sama kang Harvey Keh, Ruperto Alerosa, Gibby Gorres, Risa Hontiveros, ug Walden Bello nga maoy misang-at og petisyon kalabot sa tulo ka kaso nga gipasaka batok kang Corona ngadto sa Ombudsman.
Hinuon si Morales miklaro nga ang Ombudsman wala pa magsugod sa imbestigasyon sa giingong dollar account ni Corona sanglit nagpadayon pa man ang impeachment trial.
Apan midugang siya pag-ingon nga ang Ombudsman mihangyo kang Corona sa pagtubag sa mga kaso nga gipasaka batok kaniya.
Ubos sa balaod, si Corona hatagan og 72 ka oras sa pagtubag sa mga reklamo ug niadtong Martes siya gitahasan sa pagsumiter sa iyang mga tubag.
Ang Ombudsman mimando kang Corona sa pagpasabot bahin sa 10 milyones dolyares nga gideposito niya sa nagkadaiyang mga bangko.
Hinuon kining tanan hingpit nga gipanghimakak ni Corona ug gusto niya nga ang Ombudsman moesplikar kung giunsa nila pagkakuha ang maong impormasyon.
Sayo niini gipahayag ni Corona nga moatubang lamang siya impeachment court kun si Morales moatubang usab. - BANAT NEWS