CEBU, Philippines - Ang Police Coordinating and Advisory Council (PCAC) mohangyo sa Bureau of Customs nga ipadonar ngadto sa Cebu City Police Office (CCPO) ang mga bala nga ilang nasakmit sa miaging tuig.
Matud pa sa chairman sa PCAC nga si Eugene Elizalde nga dako kaayo og ikatabang ang maong mga bala sa operasyon sa CCPO.
Sa gihimong tigum sa PCAC kagahapon, nakahukom ang mga sakop niini nga mohandos sila og resolusyon kalabot niini aron pormal nila nga ikapadangat ang ilang hangyo ngadto sa buhatan sa Custom.
Kahinumdoman nga nasakmit sa mga sakop sa BOC ang mga bala nga gisulod sa usa ka container van niadtong Nobembre sa miaging tuig.
Matud pa ni Elizalde nga imbes itanggong nila kini sa bodega, mas maayo pang idonar na lang kini sa kuwerpo sa kapolisan.
Naglaum hinuon ang PCAC nga makaangkon sila og positibong tubag gikan sa Custom.
Ang PCAC padayong mokooperar sa nagkadaiyang mga programa sa BOC alang sa pagpalig-on sa operasyon sa kapolisan. (BANAT NEWS)