Polis sa Mandaue ug lapu magpa-drug test?

CEBU, Philippines - Gihagit karon ang kapolisan sa siyudad sa Lapulapu ug Mandaue sa pagpatuman og balik sa random drug testing sa tanang mga polis nga nadistino ning maong mga siyudad ingon man sa mga kawani sa local nga kagamhanan.

Ang kanhi Undersecretary sa Dangerous Drugs Board (DDB) Paul Clarence Oaminal mipalanog sa maong hagit human ipatuman og balik ni Sr. Supt. Ramon Melvin Buenafe, hepe sa Cebu City Police Office (CCPO) ang random drug testing sa kapolisan nga nadistino sa dakbayan sa Sugbo.

Kini tungod kay subay sa record niadtong milabay’ng tuig mikabat og 5,636 ka mga polis ang gipaubos sa random drug testing ug 27 niini ang positibo paggamit og gidiling drugas. Nunot niini giawhag ni Oaminal ang Civil Service Commission (CSC) sa pag-taktak sa serbisyo niadtong mga polis ug kawani sa gobyerno nga masakpang tiggamit og gidiling drugas agi og pagtuman sa lagda nga gipagawas dihang gipatuman ang Dangerous Drugs Act of 2002.

Gumikan   niini gipanghatagan ni Oaminal og kopya ang mga Regional director sa CSC ingon man   ang Department of Interior and Local Government (DILG) nga maoy basihan nila pagpatuman og silot batok niadtong mga sakop nga ma-positibo sa paggamit og illegal drugas.

Si Oaminal maoy mirekomendar kaniadto sa pagpatuman sa random drug testing sa mga kawani sa goberno nga miresulta sa pagkamugna sa CSC Circular No. 13 nga nagpatuman sa   Drug Free Workplace Program niadtong Hulyo 28, 2010.

Gumikan niini malaumon ang kanhi DDB Undersecretary nga malimpyohan ang han-ay sa kapolisan ug mga kawani sa lokal nga kagamhanan gikan sa mga adik -adik nga kawani.(/WC) (BANAT NEWS)