Wanted sa Naga napusilan

CEBU, Philippines - Nalandig sa tambalanan ang usa sa most wanted sa dakbayan sa Naga human kini mapusili sa tiil sa polis nga misikop kaniya kagahapon sa hapon diha sa barangay Inuburan sa nahisgutang siyudad.

Si Edwin Sayaboc, 37, taga barangay Cabungahan kinsa nagtago-tago sulod na sa lima ka tuig ang giingong misuway sa pagsukol sa polis nga misikop kaniya maong napusilan ug gidala sa Vicente Sotto Memorial Medical Center. Si PO3 Francisco Codiñera, imbestigador sa Naga City Police Station nagkanayon nga nakadawat sila og report nga si Sayaboc naa sa barangay Inuburan hinungdan ilaha kining giadto.

Si Sayaboc adunay warrant of arrest sa kasong murder nga giluwatan ni Regional Trial Court (RTC) Judge Galicano Arriesgado sa Branch 7 sa dakbayan sa Naga tungod sa pagkalambigit sa pagpamusil niadtong 2007 ug mitago sa Mindanao.

Apan pag-abot sa mga polis kalit mibunot sa giluklok nga kalibre .38 si Sayaboc apan naunhan kini og pusil ni PO2 Orlan Condes.

Nakuha gikan sa suspek ang kalibre .38 nga may tulo ka mga buhing bala.  (BANATNEWS)