LP way klarong kandidato sa Talisay

CEBU, Philippines - Ang Liberal Party (LP) magsabot pa kun kinsay mokandidato sa pagka-mayor sa dakbayan sa Talisay matud ni manlalaban Hilario “Jun-Jun” Davide III, ang chairman sa LP sa lalawigan sa Sugbo.

Sayo niini naglaraw ang LP sa pagtugpo kang Mimo Osmeña, nga maoy pakandidatohon sa pagka-mayor sa maong dakbayan, samtang ang amahan niya nga si kanhi gobernador Lito Osmeña mao usab ang mokandidato sa pagka-kongresista sa unang distrito sa lalawigan sa Sugbo.

Apan niining ulahi lang giingong miatras na si Mimo ug dili na mahinayon sa pagkandidato sa pagka-mayor sa Talisay. Gikataho nga may mga sakop sa LP ang giingong gibati og kalaay tungod kay wala kini suportahi sa partido. 

Si Davide sa iyang bahin nagkanayon nga kuwang siya sa panahon sa pagpakigtagbo sa tanang mga lider sa LP sa kalungsoran ug kabarangayan busa midestino siya og mga lider sa maong mga dapit nga maoy direktang kontak sa mga lokal nga lider sa LP.

Apan matud niya nga gipaningkamutan nila nga magkakita-kita sila aron kahatagan og pagtagad ang tanan nilang mga problema.

Samtang sa bahin sa kampo ni Gullas, ang bag-ong kaugmaran nagbutyag nga si Samsam Gullas, apo  ni kongresista Eduardo Gullas, maoy mokandidato sa pagka-mayor sa Talisay.

Sayo niini daan nang mibahad si Samsam nga tungod sa maayong pagdumala sa iyang apohan sa unang distrito sa lalawigan wala siyay gikahadlokan nga mahimong kontra niya sa hain mang posisyon nga iyang lansaran sa umaabot nga election sa tuig 2012. - BANAT NEWS