CEBU, Philippines - Nunot sa mga reklamo bahin sa giingong grabeng pagpayuhot sa mga imported nga karneng baboy ug manok si Bureau of Customs commissioner Ruffy Biazon mimando sa tanang district collectors nga pahugtan pa ang ilang pagbantay sa mga imports ug ipatuman ang 100% inspection sa tanang refrigerated container vans.
Si Biazon miingon nga nagpaabot pa siya og report bahin sa mga gidudahang importers niini lakip na ang sa Cebu nga giingong nalambigit sa smuggling og karne.
"We are reviewing the accreditation of suspected importers," matud pang Biazon, sa text message niini.
Si Biazon midugang nga ang BOC ug mga hog raisers aduna nay memorandum of agreement atol sa tulo ka adlaw nga hog convention nga gihimo sa Cebu sa nakalabay’ng semana.
Tuyo niini nga palig-unon pa ang kooperasyon pinaagi sa pagbutang og mga eksperto sa maong industriya nga mangunay og tan-aw sa proseso sa importasyon diha sa BOC aron dunay transparency.
Midugang si Biazon nga ilaha usab gitun-an karon ang pagpalig-on pa sa inspection procedures uban sa Department of Agriculture ug Bureau of Animal Industry.
Kahinumdoman nga ang hog raisers nagkasabot nga molusad og nationwide “pork holiday” (April 27-28) aron ipabatyag sa gobiyerno ang ilang pagkaalkanse tungod sa walay puas nga pagpalusot og imported nga karne nga gibanabana nilang mokantidad na og P8.5 bilyones sulod sa nangaging walo ka bulan.
Si Rolando Tambago, presidente sa Central Visayas Pork Producers Cooperative (CVPPC) miingon nga ang mga namuhi og baboy dinhi sa Sugbu maoy unang mitiyabaw ug mireklamo bahin sa importasyon og karne sukad pa sa nakalabay’ng tuig.
Matud pang Tambago nga daghang mga meat importers nga nag-operate dinhi sa Sugbu hinungdan nga dinagko ang importasyon sa imported meat dinhi.
Matud pa sa pagtuon sa SDC, gibanabanang 36 milyones ka mga Filipino ang nagsalig sa pagpamuhi og manok, baka ug baboy ug kadaghanan kanila gisaligan usab sa mga mag-uuma o mga industriyang nananom og cassava, mais, rough rice ug lubi. – (BANAT NEWS)