Lalaki gipusil patay sa tugkaran

CEBU, Philippines - Usa ka lalaki ang gipusil patay gikan nigawas sa iyang panimalay sa bukirang bahin sa barangay Campo 8 lungsod sa Minglanilla sa alas 2:15 sa kaadlawon niadtong Biyernes apan  Huwebes pa sa gabii kini gituohang nahitabo.

Ang biktima mao si Edgar Alcontin Jimenez, 39, nagpuyo sa maong lugar samtang padayon pang giila sa kapolisan ang mamumuno sanglit way mga silingan nga nakahatag og impormasyon kabahin sa hitabo.

Matud ni PO1 Paula Lumacang sa Minglanilla Police Station dihang nahinabi sa Banat News giingong may namato sa panimalay sa biktima nianang pagkagabii hinungdan nga kini migawas dala ang tirador ug pinote.

Apan dihang nakagawas kini sa balay kalit nga milanog ang tulo ka butobuto sa armas ug nahagba ang biktima. Sa pagresponde sa kapulisan diha pa natino nga nakaangkon kini og samad pinusilan sa tuong bukton nga nilapos ang bala   sa lawas nga nakaingon sa hinanali niya nga kamatayon.

Gisubay karon sa kapolisan ang pasangil sa mga molupyo nga giingong manghilabot kini sa maong lugar nga nagpasabot mangawat, dunay pagduda ang kapolisan nga posibleng kini maoy motibo sa krimen. (BANATNEWS)