CEBU, Philippines - Duha ka mga tawo ang nadakpan lakip na ang gipasanginlang ‘drug lord’ sa mga polis nga napusilan sa mga sakop sa Provincial Intelligence Branch (PIB) sa lungsod sa Carmen ug sa buwag nga operasyon sa Cebu City Police Office City Intelligence Branch niadtong Miyerkules. Ang nalandig sa tambalanan mao ang suspek nga si Rolando Casas, taga sitio Malbago, Barangay Luyang,lungsod sa Carmen human kini mapusili sa iyang paa.
Matud ni SPO2 Simplicio Gibo, desk officer sa Carmen Police mibutyag sa Banat News nga ang Provincial Intelligence Branch (PIB) sa Cebu Police Provincial Office (CPPO) pinangulohan ni PO3 Rolando Solante maoy milusad sa operasyon niadtong tungura.
Sumala pa niya dihang natunol ang marked money nga ‘P36 mil’ sa poseur buyer bugti sa usa ka bulto nga shabu gikan ni Casas nakamatikod ang suspek nga polis ang iyang gikatransaksyon ug miibot kini sa iyang armas apan naunhan sa mga polis.
Si Casas gidala dayon sa Danao City District Hospital ug luwas na ang kahimtang, nakuha gikan kaniya ang usa ka bultong gituohang shabu ug kalibre .45 nga pistola.
Sa laing bahin, nakaipsot gikan sa CIB ang laing gipasanginlang drug pusher nga si Florinda Paras, taga sitio Mahayahay, A. Lopez St., Labangon, ning dakbayan pasado alas-4 sa kaadlawon human kini makabantay nga polis ang mipalit kaniya og shabu nga balor P500.
Lakip sa nakaipsot mao ang batabata niini nga naila lang sa pangalan nga “Mino” apan nadakpan sa mga polis ang igsuon ni Paras nga si Marycris Paras, 21, nga taga Sitio San Vicente, Barangay Yati, Liloan diha sa maong dapit.
Narekober nga mga ebidensya mao ang usa ka medium pack nga may sulod nga gidudahang shabu nga nagkantidad og P6,000, 49 ampules sa nubain, duha ka cellular phones ug mga gamit sa pag-repack og ilegal nga drugas ug mga drug paraphernalia. (BANATNEWS)