CEBU, Philippines - Human sa 22 ka tuig nga pagtago nadakpan na gyud sa City Intelligence Branch (CIB) sa miaging gabii diha sa gitrabahoan niini ang usa ka lalaki nga wanted sa kasong pagpatay niadto pang dekada 90. Si Chief Insp. Romeo Santander, hepe sa CIB miila sa dinakpan nga mao si Gerard Ursabia Garde, 54, nagpuyo sa Maria Theresa Village 1 sa barangay Guadalupe ning dakbayan subay sa warrant of arrest (WOA) sa kasong murder nga giluwatan niadto pang Septiyembre 10, 2004 ni Judge Aproniano Taypin sa Regional Trial Court Br. 12.
Walay piyansa nga girekomendar ang korte ning kasong giatubang ni Garde. Matud ni Santander sa Banat News nga ilang giukay ang karaang records sa WOA dihang dili pa siya maoy hepe sa maong buhatan ug ilang nakit-an ang kang Garde. Hinuon wala mosukol si Garde dihang ila gidakop sa iyang gitrabahoan diha sa barangay Guadalupe pasado alas-8 sa miaging gabii.
Si Santander miingon nga mi-claim si Garde nga usa siya sa mga body guards sa usa ka partylist representative.
Matud pa ni Santander nga mitug-an kaniya si Garde nga daghan sila nga nalambigit sa pagpusil patay sa biktima 22 na ka tuig ang nakalabay apan tungod kay iyang napasagdan ang maong kaso, mao nga nalutsan siya og WOA sa korte. (BANATNEWS)